Жаңа интерактив усылдағы сабақ

  - 114


Ҳәзирги  ўакытта жаңа метод ямаса инновация­ларды билимлендириўге енгизиў ҳаққында гәп кеткенде информациялық-коммуникациялық технологияларды, яғный, интерактив методларды оқыў процес­синде қолланыў түсиниледи.

Интерактив усылдың бас мақсети – оқыў процесси  ушын қолайлы ша­раят жаратыў арқалы оқыўшының актив еркин пи­кир жүритиўине имканият бериў. Интерактивлик тий­карында өткерилген сабақларда бирде бир оқыўшы шетте қалмайды ҳәм олар билген билимин, ойларын, пикирлерин ашық айдын билдириў имканиятына ийе болады. Оқыўшылар топарларда ислеў арқалы тема мазмунын билиўге, үйрениўге ийе болады.

Ҳәзир педагогикалық әмелиятта жаңа педтехнологиялардың кең түрде әмелге асырылып атырғанлығын көриўимизге болады. Бирақ жаңа педтехнологиялар жәрдеминде окыўшыларға билим бериў ушын оқытыўшы технологиялық билимге, тәжирийбе ҳәм көнликпелерге ийе болыўы керек.

Лицейимизде оқытыўшылар тәрепинен күнделикли сабақлар ҳәм оқытыўшылардың өз-ара тәжирийбе алмасыўы мақсетинде ашық сабақлар интерактив усылларда өтилмекте. Атап айтсақ, усылицейдиң қарақалпақ тили ҳәм әдебияты пәни оқытыўшысы Қуралай Базарбаева 102-топарға “Омоним, антоним, синонимлердиң қолланылыўы” деген темада ашық сабақ өтти. Сабақта тийкарынан интерактив методлардан: киши топарларда ислесиў, көрсетиў, түсиндириў, ақылый ҳүжим, инсерт, БББ методларынан пайдаланды. Сабақты қуралландырыўда қосымша әдебиятлардан, қарақалпақ тилиниң түсиндирме сөзликлеринен, темаға байланыслы тарқатпа материаллардан, кросс­вордлардан, слайдлардан, шынығыўлар топламынан пайдаланды ҳәм киши то­парларды өз-ара жарыстырды.

Дилара РАМЕТОВА,

Өзбекстан Республи­касы Ишки ислер ми­нистрлиги Қарақалпақ академиялық лицейиниң оқытыўшысы.

Поделиться: